UNA SPLENDIDA CUBIA DEI RARI ALLOCCHI DEI URALI XE RIVADA A LA RISERVA DE CORNINO DAL AUSTRIA: IUTERÀ LA DIFUSION DE LA SPECIE, CO LA LIBERAZION DEI NOVI NATI
In Italia el allocco dei Urali xe presente e nidificante solo in Friuli Venezia Giulia
FORGARIA NEL FRIUL / Dò splendidi esemplari de allocco dei Urali, un dei più grandi rapaci noturni europei – sparpaiado dal Giapon a la taiga asiatica e apunto al Europa, fin al Italia, dove xe presente e nidificante solo in Friuli Venezia Giulia -, xe stadi consegnadi da ricercadori dela Università de Viena a la Riserva naturale regionale del lago de Cornino, dove xe stadi sistemadi in una voliera positamente preparada. Se trata de sogeti giovani e potenzialmente in grado de nidificar: Franz, un mas’cio de 6 ani, xe nato nel Zoo de Ostrava (Republica Ceca), mentre la femina, Sissi, xe nata sto ano nel Parco Zoologico de Cracovia (Polonia).
Dopo la reintroduzion de la specie nei boschi de la Baviera, anche in Austria xe sta perfezionado, fra el 2006 e el 2008, un progeto basado su una metodologia originale, rivelada vinzente: tignir le cubie dei rapaci in zoo, apunto, o in centri specializadi, in aposite voliere, e liberar po i giovani nati. Vien doprade procedure specifiche, per otignir individui in grado de adatarse a la vita selvadiga (dunque co un minimo contato co l’omo) e a garantir una popolazion con una adeguada variabilità genetica. Responsabile del progeto xe el dotor Richard Zink, de la Facoltà de Veterinaria dela Università de Viena.
Ogni ano vien liberà qualche giovine (la prima liberazion, nei boschi de Viena e ne la Riserva forestale Duerrenstein, xe del 2009), che dopo un certo periodo scominzia a formar cubie teritoriali nidificanti, destinade a aumentar progresivamente e a ocupar teritori sempre più grandi. La popolazion de allocchi dei Urali conta atualmente almeno 50 cubie riprodutive, su un totale de zirca 500 esemplari liberadi; ulteriori 50 cubie, che continua a riprodurse, xe ospitade in varie struture.
«Un progeto importante, che coinvolgi prestigiose realtà europee, tra cui la Riserva naturale regionale del lago de Cornino, che ga in sto modo la oportunità de partecipar a un pian de conservazion ala avanguardia», comenta el diretor sientifico de la Riserva, Fulvio Genero, che ga ingrumado i novi rivai insieme al vicesindaco de Forgaria, Luigino Ingrassi, al presidente de la Cooperativa Pavees (che gestisi el sito proteto) Luca Sicuro, a la vicepresidente Sabrina Martinelli e al staff de la Coop. «Xe nostra intenzion – concludi el vicesindaco Ingrassi – coltivar e potenziar i raporti transfrontalieri con realtà de spico com la Università austriaca, in modo de far creser, ancora de più, la conosenza de una progetualità de alta valenza sientifica».
