El progeto “Triesteabbandonata”, che dal 2015 punta l’atenzion sui loghi abandonai de Trieste e del Friuli Venerzia Giulia, per contarne la storia e sburtar interventi de riutilizo, torna con una nova mostra, dal titolo “Metamorfosi la rinascita dall’Abbandono”. Dopo le due esposizioni promosse al centro comerciale Montedoro de Mujia, quela realizada a la Biblioteca Statale Stelio Crise de Trieste e quela alestida al ex ospedal militar de Trieste, e dopo convegni e momenti de aprofondimento, sta volta l’atenzion xe incentrada soratuto su imobili restai seradi per sai tempo e che, per fortuna, xe stai ogeto de interventi de sistemazion. Demolidi o riadatadi per ospitar nove atività, nel teritorio de Trieste e in quel de Gorizia.
A curar el progeto de “Triesteabbandonata” xe i giornalisti Micol Brusaferro e Emilio Ripari e la fotografa Giada Genzo, che nel corso dei ani ga mapado una longa serie de beni con scati e video, ricostruindo le origini dei loghi, la sua storia, le vicende che ga portado a la dismision e el stato che versa i vari siti. Traverso un blog e le pagine social colegade xe stadi documentadi imobili de diverso tipo: caserme, scole, fabriche, vile antiche, discoteche e altri locai deputadi a musica e fraja, e ancora edifici feroviari, alberghi e impianti sportivi.
La mostra “Metamorfosi” xe organizada dal asociazion culturale DayDreaming Project, che ga sposà el progeto de “Triesteabbandonata”, grazie a un contributo de la Region Fvg, valorizando i materiali ingrumadi, foto e testi che sarào esposti al interno de Hangar Teatri, in via Pecenco 8, a Trieste. Anteprima stampa lunedì 16 otobre alle 17.30, apertura al pubblico alle 18.30, co la presentazion del iniziativa alle 19. L’evento xe a ingreso libero.
Nel esposizion vien racontadi qualchedun dei siti che Micol, Emilio e Giada ga tocà nel corso del tempo, come la popolare discoteca Hippodrome de Monfalcon, diventada un supermercato dopo un longo intervento de demolizion e ricostruzion. Compagno destin anche per l’area che a Trieste ospitava un grande centro dati, in via dell’Istria, anche qua un cambiamento xe sta dopo un complicado lavoro de ruspe e abatimenti, mentre una storica fabbrica, sempre a Trieste, xe diventada un impresa de spedizioni riadatando completamente i fabricati presenti e abandonadi per deceni. Ne la mostra ghe sarà comunque spazio per ricordar anche la presenza de ruderi che ancora desso speta una nova vita.
“El nostro impegno, che dura ormai de oto ani, xe quel de puntar l’atenzion sui loghi abandonai ne la speranza che i vegni risistemadi. Spesso diversi imobili xe restai sai tempo nel oblio e per noi xe stadi una sorpresa – spiega Micol, Emilio e Giada – perché i scondi storie incredibili, che val la pena ricuperar. E racontar. Speremo che el nostro lavor sia de stimolo per sburtar una rinasita de tanti loghi che ancora desso xe dismesi. Purtropo quasi in ogni logo, dopo che xe sta serà, no xe sta un ricupero imediato, con la conseguenza che vandali e stratempi ga compromesso struture un tempo sane e operative. El patrimonio de abandoni in Friuli Venezia Giulia purtropo xe imenso. El desiderio xe che, anche grazie al nostro contributo, prima o dopo ghe sia una svolta decisa”.
